Македонската машка одбојкарска репрезентација ги загуби шансите за пласман во осминафиналето на Европското првенство, откако вечерва во Софија беше поразена од Португалија со 3:0 во сетови (25:13, 25:20, 25:20).
Наместо издание со кое ќе остане во игра за следната фаза, избраниците на селекторот Јошко Миленкоски одиграа еден од најслабите натпревари на шампионатот и не успеаја да го прикажат нивото од претходните средби.
Португалија уште од почетокот на првиот сет ја презеде контролата. Иако Македонија успеа кратко да израмни на 6:6, противникот брзо направи серија поени и стекна убедлива предност, која ја претвори во лесно освоен сет со 25:13.
Во вториот сет македонските одбојкари покажаа подобра игра и во еден момент поведоа со 10:8. Сепак, Португалците повторно успеаја да се вратат, го презедоа водството и со подобра игра во завршницата го добија сетот со 25:20.
Најголема надеж се појави во третиот сет, кога Македонија отвори со предност од 6:3. Но, Португалија повторно успеа да го сврти резултатот, а по серијата македонски грешки ја зголеми разликата и рутински го приведе натпреварот до крај, освојувајќи го и третиот сет со 25:20.
Најефикасни во македонскиот состав беа Стојан Илиев и Владо Љафтов со по осум освоени поени, додека капитенот Никола Ѓоргиев натпреварот го заврши со шест поени.
Кај Португалија најрасположен беше Фереира, кој го предводеше својот тим со 17 поени.
Македонската репрезентација утре ќе го одигра последниот натпревар на Европското првенство против Израел, со што ќе го заокружи својот четврти настап на континенталниот шампионат.
