Премиерот Христијан Мицкоски со владина делегација заминува во Соединетите Американски Држави, каде што најави средби на високо ниво во Вашингтон и учество на Генералното собрание на Обединетите нации во Њујорк. Во Вашингтон се планирани разговори со претставници на Сенатот, Конгресот и Стејт департментот, како и со американската финансиска институција DFC.
Мицкоски најави дека на DFC ќе ѝ бидат претставени македонските капацитети и можностите за нови инвестиции во енергетиката и напредните технологии. Тој посочи дека ќе има разговори и со компании од воената индустрија кои Владата сака да ги привлече да инвестираат во Македонија, а во подготовка е и нов закон со Министерството за одбрана.
Како една од можностите за соработка го посочи и армискиот полигон „Криволак“, кој според Владата може да придонесе за побрз економски раст и привлекување нови инвестиции.
„Планирани се средби на ултра високо ниво во рамките на Сенатот, Конгресот и Стејт департментот и средби на ултра високо ниво со претставници на DFC“, изјави Мицкоски, додавајќи дека ќе разговара и со влијателни тинк-тенк организации.
По посетата на Вашингтон, владината делегација ќе замине во Њујорк, каде што Мицкоски ќе учествува на годинашното Генерално собрание на ОН и ќе има повеќе билатерални средби.
Според премиерот, веќе се потврдени разговори со државници од соседството, а ќе се бараат средби и со претставници на земјите од Заливот за градење посилни партнерски односи.
Предвидено е и присуство на приемот што традиционално го организира претседателот на Соединетите Американски Држави за учесниците на Генералното собрание.
Мицкоски рече дека во моментов не е планирана средба со бугарската делегација за време на престојот во Њујорк. Потврден е, сепак, состанокот на лидерите од Западен Балкан што традиционално се одржува на маргините на Генералното собрание, а македонското учество ќе зависи од нивото на средбата.
Во однос на спорот со Бугарија и барањата за уставни измени, Мицкоски порача дека Владата останува на досегашната позиција, нагласувајќи: „Ние ставовите не ги менуваме инстант или преку ноќ“, туку водиме политика која, како што рече, треба да понуди гаранции на подолг рок.
