Функционер на Царинската управа е уапсен во акција на Министерството за внатрешни работи и Јавното обвинителство, откако бил затекнат при примање обележани парични средства во износ од 17.500 евра.
Од Јавното обвинителство за гонење организиран криминал и корупција информираат дека акцијата била спроведена под раководство на надлежен јавен обвинител, а ја реализирале полициски службеници од Одделот за сузбивање на организиран и сериозен криминал при МВР.
Според првичните информации, уапсениот, кој извршувал функција помошник-директор во Царинската управа, ги побарал парите како поткуп за да го искористи своето влијание во две постапки што се воделе пред институцијата.
Од Обвинителството најавија дека повеќе детали за случајот ќе бидат соопштени во текот на утрешниот ден.
И од Министерството за внатрешни работи потврдија дека лицето е лишено од слобода додека примало претходно обележани парични средства во износ од 17.500 евра.
По целосното документирање на случајот, против осомничениот ќе биде поднесена соодветна кривична пријава до Основното јавно обвинителство за гонење организиран криминал и корупција.
Во претходно објавени информации беше наведено дека уапсениот побарал поткуп поврзан со тендерска постапка во Царинската управа. Според тие информации, при полициската акција тој не застанал на наредбите на полицијата и се обидел да избега, но набргу бил приведен.
