Пет лица биле приведени за време на вчерашниот концерт на светски познатиот диџеј Дејвид Гета во Арената „Тодор Проески“ во Скопје.
Според информациите од Министерството за внатрешни работи, биле регистрирани две нарушувања на јавниот ред и мир, при што полициските службеници интервенирале и ги привеле петте лица.
Од МВР оценуваат дека настанот од безбедносен аспект поминал исклучително мирно, без сериозни проблеми ниту при обезбедувањето на објектот, ниту при регулирањето на сообраќајот околу арената.
Полицијата информира дека движењето на посетителите пред почетокот и по завршувањето на концертот се одвивало без поголеми застои и проблеми.
Големиот музички настан, на кој настапи Дејвид Гета, собра илјадници посетители во рамки на одбележувањето на 35-годишнината од независноста на Македонија.
