Повеќе од 15.000 посетители го посетија паркот „Авионче“ во првите три вечери од второто издание на AERO Street Food Festival, соопштија организаторите.
Фестивалот, кој започна на 4 септември во општина Аеродром, денеска и утре влегува во завршната фаза, а публиката ќе има можност да проследи настапи на South Park, Acoustic Division и Sure Shotz. Влезот за сите содржини останува бесплатен.
Првата фестивалска вечер беше отворена со диџеј сетови на Milan Serafimov и Aleksandar Jordanov, по што настапи бендот The Ringtones.
Најголема посетеност имаше во саботата, кога голем број граѓани го исполнија просторот околу 20-те штандови на домашни и регионални гастрономски брендови, каде посетителите имаа можност да уживаат во разновидна понуда на храна и пијалаци.
Неделната програма донесе поинаква музичка атмосфера со настапите на бендот Dopamine и диџеј Rizinski, кои ја забавуваа публиката до полноќ.
Денешната програма започнува со настапите на диџеите од колективот Fluere, по што на главната сцена ќе настапи бендот South Park.
Завршната вечер, на 8 септември, ќе биде отворена со DJ Ficho и DJ Guardian. Следува настапот на Acoustic Division со специјален репертоар, а фестивалското издание ќе го затвори составот Sure Shotz.
Фестивалскиот простор во паркот „Авионче“ секој ден ги отвора портите од 17:30 часот, додека музичката програма започнува во 19:30 часот.
Организаторите ги повикаа граѓаните да бидат дел од последните фестивалски вечери и потсетија дека пристапот до сите настани е бесплатен.
