Во Основниот кривичен суд Скопје денеска треба да продолжи судскиот процес за наводните злоупотреби во АД „Државна лотарија“, во кој меѓу обвинетите е и поранешниот вицепремиер Артан Груби.
На претходното рочиште главната расправа беше одложена, откако Судот оцени дека обвинетите и нивните бранители треба да добијат дополнително време за увид во доказниот материјал и подготовка на одбраната.
Судијката Билјана Шуплиновска-Јовевски тогаш истакна дека на обвинетите мора да им се овозможи доволно време да се запознаат со сите доставени докази и да предложат свои докази во понатамошниот тек на постапката.
Обвинението го застапуваат јавните обвинители Даниел Коцев и Александар Давчевски, кои најавија дека во постапката ќе бидат изведени 231 материјален доказ, повеќе вештачења, како и сослушување на седум сведоци.
Според обвинителниот предлог на Основното јавно обвинителство Скопје, Артан Груби и уште седум лица се сомничат дека во текот на 2023 и 2024 година, со пречекорување на службените овластувања, предизвикале штета на АД „Државна лотарија“ во износ поголем од 507 милиони денари. На обвинетите им се става на товар кривичното дело злоупотреба на службената положба и овластувањето.
Првообвинетиот, поранешниот директор на „Државна лотарија“, Перпарим Бајрами, сè уште е недостапен за органите на прогонот, додека за Артан Груби Обвинителството бара продолжување на мерката куќен притвор.
