Во Македонија од почетокот на годинава досега се регистрирани 56 случаи на западно-нилска треска, што е повеќе од вкупниот број случаи евидентирани во периодот од 2011 до 2025 година.
Според најновиот извештај на Институтот за јавно здравје (ИЈЗ), најпогоден е скопскиот регион, а најголема концентрација на заболени има во општините Кисела Вода и Гази Баба.
Од вкупно 56 регистрирани случаи, 52 се лабораториски потврдени, а четири се водат како веројатни. Дури 54 заболени се жители на Скопје, додека по еден случај е пријавен во Велес и Куманово. Повеќето случаи се автохтони, а само еден пациент имал историја на патување во Грција, но периодот на инкубација опфаќал и престој во Македонија.
Болеста најчесто ги погодува повозрасните лица. Од заболените, 44 се мажи, односно 78,7 проценти, а 12 се жени. Најголемиот број пациенти – 45 лица – се постари од 60 години, а просечната возраст на заболените изнесува 65,8 години.
Најголем број случаи се регистрирани во летниот период. Кај 36 пациенти симптомите започнале во август, кај 17 во јули, два случаи се појавиле во јуни, а првиот случај годинава бил евидентиран со почеток на симптомите на 12 мај.
Од вкупниот број заболени, 54 пациенти развиле невроинвазивна форма на болеста и сите биле хоспитализирани. Најголем дел од нив биле лекувани на Инфективната клиника во Скопје.
Шест пациенти починале од последиците на болеста, а сите биле мажи со просечна возраст од 73,2 години. Леталитетот кај потврдените случаи изнесува 10,7 проценти.
Центарот за јавно здравје Скопје на 11 август прогласи епидемија на западно-нилска треска во општините Кисела Вода, Гази Баба, Аеродром и Бутел. Според анализите на ИЈЗ, најголем број заболени има во Кисела Вода, особено во подрачјето на Драчево, како и во Гази Баба, каде случаите се почести во руралните средини.
Западно-нилската треска за првпат во Македонија е регистрирана во 2011 година. До крајот на 2025 година биле потврдени 54 случаи и пет смртни случаи. Само годинава бројот на заболени достигна 56, што значи дека речиси половина од сите случаи регистрирани во земјава од 2011 година досега се појавиле во 2026 година.
ИЈЗ препорачува граѓаните да преземат мерки за заштита од убоди од комарци, како отстранување на застоена вода од садови, саксии, буриња, канти и стари гуми, редовно чистење на олуците и одржување на базени и други водни површини.
Од Институтот потсетуваат дека ширењето на вирусот не може однапред точно да се предвиди, па личната заштита од комарци останува најважна превентивна мерка во текот на целиот период на нивна активност.
