Националната установа Музеј на македонската борба за самостојност денеска со свечена програма ќе одбележи 15 години од своето основање, преку презентација на дел од изложбените, издавачките и програмските активности реализирани во изминатиот период.
По повод јубилејот, во музејот ќе биде отворена ретроспективна изложба на плакати од досега реализираните изложби, а посетителите ќе имаат можност да разгледаат и дел од печатените изданија и каталози објавени во текот на изминатите петнаесет години.
Во рамки на програмата ќе биде прикажана и видеопрезентација со архивски материјали, преку која ќе биде претставен развојот на установата, нејзините најзначајни проекти и реализирани активности.
Од Музејот посочуваат дека одбележувањето на 15-годишниот јубилеј претставува можност за осврт на изложбите, проектите и соработките што ја одбележале работата на институцијата.
Свеченоста ќе започне во 19:00 часот, а по тој повод ќе бидат доделени благодарници на поединци и институции кои со својата поддршка придонеле за развојот и унапредувањето на работата на Музејот на македонската борба за самостојност.
