Министерката за енергетика, рударство и минерални суровини Сања Божиновска денеска и утре престојува во Солун, каде што ќе учествува на самит и форум посветени на регионалната енергетска безбедност и соработка.
Утре Божиновска ќе се обрати на 6. Метрополитен самит „Во пресрет на 2030 година: поврзаност и раст за Југоисточна Европа“, како и на јубилејниот 10. Форум за енергетика на Југоисточна Европа, каде што ќе го потпише Меморандумот за соработка со кој Македонија официјално ќе се приклучи кон Вертикалниот гасен коридор.
Со потпишувањето на документот, земјава станува дел од една од најзначајните европски иницијативи за диверзификација на снабдувањето со природен гас и зајакнување на енергетската безбедност во Југоисточна, Централна и Источна Европа.
Вертикалниот гасен коридор ќе биде една од главните теми на Метрополитен самитот, на кој ќе се разговара за геополитичките предизвици, инфраструктурното поврзување, регионалната економска соработка и зелената енергетска транзиција.
Според организаторите, Југоисточна Европа и источниот Медитеран имаат сè поголемо стратешко значење за енергетската и безбедносната стабилност на Европа, особено во услови на глобални геополитички промени.
На Форумот за енергетика ќе учествуваат министри, претставници на водечки енергетски компании, меѓународни институции, регулатори, експерти и инвеститори, кои ќе дискутираат за енергетската сигурност, обновливите извори на енергија и продлабочувањето на регионалната соработка.
