Министерот за надворешни работи и надворешна трговија Тимчо Муцунски, во интервју за израелскиот весник „The Jerusalem Post“, изјави дека Република Северна Македонија има потенцијал да стане значајна влезна точка кон Европа за израелските туристи, компании и инвеститори.
Во рамките на неговата прва официјална посета на Израел како министер, Муцунски посочи дека една од клучните теми во разговорите била можноста за воспоставување директна авиолинија меѓу Тел Авив и Скопје или Тел Авив и Охрид.
„Една од првите теми за кои разговаравме беше можноста за воспоставување директна авиолинија меѓу Тел Авив и Скопје или Тел Авив и Охрид, кој е нашиот главен туристички центар и град за кој верувам дека секој Израелец би сакал да го посети“, изјави Муцунски.
Според него, целта не е само да се зголеми туристичката размена, туку и да се создадат подобри услови за економска соработка и инвестиции.
Министерот нагласи дека стратешката положба на Македонија, на пресекот на Коридорите VIII и X, како и инвестициите во транспортната и енергетската инфраструктура, можат да ја направат земјата привлечна дестинација за израелските компании кои сакаат да се прошират на европскиот пазар.
„Сакаме да бидеме порта кон Европа не само за израелските туристи, туку и за израелските компании. Можеме да бидеме и влезна точка за израелските инвеститори кон европски пазар чиј потенцијал сè уште не е целосно искористен, но и пазар за извоз“, истакна Муцунски.
Во интервјуто бил нагласен и потенцијалот за продлабочување на соработката во земјоделството, управувањето со водите, безбедноста, иновациите, туризмот, здравството, образованието, инвестициите и одбранбената индустрија.
Муцунски оцени дека одличните билатерални односи меѓу Македонија и Израел треба да се надградат со конкретни економски и институционални проекти, додавајќи дека Владата ги поставила односите со Израел како еден од приоритетите на надворешната политика.
„Од формирањето на Владата, билатералните односи со Израел ги поставивме како еден од приоритетите на нашата надворешна политика“, рече тој.
Во интервјуто се споменува и засилената динамика на контактите меѓу двете земји во изминатиот период, вклучително и посетата на парламентарна делегација предводена од пратеничката Рашела Мизрахи, која во јануари остварила средби со претседателот на Кнесетот Амир Охана и други високи израелски претставници.
Според Муцунски, посетата на Израел треба да придонесе за натамошно продлабочување на политичките и економските односи, отворање нови можности за инвестиции и воспоставување посилни деловни и туристички врски меѓу двете држави.
