Град Скопје уверува дека водата за пиење во главниот град е целосно безбедна, откако во јавноста се појавија информации и шпекулации поврзани со површинска депонија која наводно претставува закана за изворот „Рашче“.
Од Градот посочуваат дека редовните лабораториски анализи потврдуваат дека водата што ја користат скопјани е микробиолошки и хемиски исправна.
Според соопштението, депонијата за која се зборува не се наоѓа на територијата на Град Скопје, туку е оддалечена околу 30 километри од изворите „Рашче“ и, според достапните информации, постои речиси три децении.
Иако не е во надлежност на Град Скопје, од локалната самоуправа нагласуваат дека секоја локација што претставува потенцијален еколошки ризик треба да биде соодветно третирана и расчистена. Во таа насока, ЈП „Водовод и канализација“ – Скопје ќе постапува во рамките на своите законски надлежности, а Градот ќе обезбеди целосна поддршка за решавање на проблемот.
Од Град Скопје информираат дека контролата на квалитетот на водата се врши континуирано. Секој ден се земаат примероци од 36 до 40 различни локации низ водоснабдителниот систем, кои детално се анализираат во лабораториите на ЈП „Водовод и канализација“.
Дополнително, изворот „Рашче“ е под постојан 24-часовен надзор, со физичко обезбедување, видеонадзор и воспоставени мерки за заштита на извориштето.
Од Градот апелираат граѓаните да не наседнуваат на непроверени информации и шпекулации кои можат да предизвикаат непотребна паника, туку да се информираат преку официјалните соопштенија и резултатите од лабораториските анализи.
„Водата што ја пијат скопјани е безбедна“, се наведува во соопштението на Град Скопје.
