Актуелниот шампион на Македонија, Вардар, со победа го започна новиот шампионат во Првата македонска фудбалска лига. „Црвено-црните“ во првото коло од есенската полусезона на Националната арена „Тодор Проески“ со 2:0 го совладаа новиот прволигаш Брегалница.
Тренерот Кристијан Фабиани се одлучи за комбиниран состав, односно со фудбалери кои имаа помала минутажа во европските настапи ова лето, но и таквата постава успеа да стигне до првите три бода во сезоната. Брегалница во одредени периоди од натпреварот покажа дека може рамноправно да се носи со шампионот, но Вардар беше поконкретен во клучните моменти.
Првата посериозна закана ја имаше Пиреш со удар од далечина, а во 12. минута Едис Спахиу се најде во добра позиција, но не успеа да реализира.
Во 27. минута стигна водството за Вардар. Спахиу одлично ја проби десната страна и испрати прецизна асистенција до Димитар Данев, кој на подалечната статива рутински реагираше и ја затресе мрежата за 1:0.
Домашниот тим можеше да постигне уште еден погодок до паузата. По прекрасна асистенција од Димитар Тодоровски, Горан Закариќ ја погоди мрежата, но по ВАР-проверката голот беше поништен поради игра со рака при приемот на топката.
Во второто полувреме Брегалница се обиде поофанзивно да одговори. Најдобрата можност за гостите ја имаше Мартин Стојанов, кој доби топка во празен простор и излезе сам пред голманот на Вардар, Диковски. Ударот од косина беше силен, но новиот чувар на мрежата на „црвено-црните“ одлично интервенираше и го спаси својот гол.
Штипјани имаа уште неколку обиди, но им недостасуваше завршен пас и подобра реализација во завршницата.
Конечниот резултат беше поставен во 81. минута. По асистенцијата на Герсон Родригес, Горан Закариќ овојпат немаше проблеми и рутински реализираше за 2:0, со што „од втора“ ја впиша својата името на листата на стрелци.
Со овој триумф Вардар успешно ја започна сезоната и најави дека ќе биде сериозен кандидат за одбрана на шампионската титула.
