Две малолетни девојчиња на возраст од 9 и 11 години трагично ги загубија животите при давење на плажа во албанското туристичко место Тале, во регионот на Лежа.
Според информациите на албанските медиуми, несреќата се случила во петокот околу 12:50 часот, додека девојчињата се капеле во морето. На местото веднаш интервенирале припадници на полицијата и присутни капачи, кои успеале да ги извлечат телата на брегот, но за нив веќе немало спас.
Од албанската полиција соопштиле дека девојчињата биле од Фуше-Круја и дека околностите под кои дошло до трагедијата сè уште се предмет на истрага. Според првичните информации, тие во моментот на несреќата биле без придружба.
Телата биле пренесени во регионалната болница во Лежа, додека обвинителството и истражните органи работат на целосно расветлување на случајот.
Дел од албанските медиуми објавија дека девојчињата влегле во морето во период кога се појавиле посилни бранови и не успеале да се вратат на брегот. Овие информации засега не се официјално потврдени и ќе бидат предмет на истрагата.
По трагичниот настан реагираше и градоначалникот на Лежа, Пјерин Ндреу, кој ја отвори дебатата за безбедноста на јавните плажи што не се под директно управување на општината или приватни концесионери. Тој посочи дека токму на ваквите локации е потребна поголема внимателност, особено кога станува збор за деца и лица кои не се искусни пливачи.
Трагедијата повторно го актуелизира прашањето за безбедноста на плажите во Албанија, присуството на спасителни служби и потребата од подобро обележување на ризичните делови од крајбрежјето во екот на летната туристичка сезона.
