Премиерот Христијан Мицкоски и министерот за економија и труд Бесар Дурмиши денеска промовираа нова странска инвестиција вредна околу 20 милиони евра, која според најавите ќе отвори меѓу 400 и 500 нови работни места.
Станува збор за инвестиција на компанијата „Џаво отомотив“, мултинационална компанија со повеќедецениско искуство во автомобилската индустрија, специјализирана за производство на безбедносни системи, контролни кабли и механизми за водечките светски производители на автомобили.
Според Мицкоски, инвестицијата претставува уште една потврда за довербата што странските компании ја имаат во македонската економија и деловна клима. Компанијата првично ќе работи во изнајмени производствени капацитети од околу 8.000 квадратни метри, а според развојниот план, до 2028 година просторот треба да се прошири на 21.000 квадратни метри.
Во периодот од 2026 до 2030 година се планирани вложувања од околу 20 до 21 милион евра, додека со целосното ставање во функција на капацитетите ќе бидат обезбедени стотици нови работни места.
Премиерот посочи дека проектот ќе има значително влијание и врз извозот, бидејќи плановите предвидуваат годишен извоз од околу 45 милиони евра.
Новата инвестиција ќе се реализира во Технолошко-индустриската развојна зона во Тетово, а компанијата планира во Македонија да го префрли производството што моментално го има во Турција и Словачка.
Според Мицкоски, ваквата одлука претставува јасен доказ за довербата на инвеститорите во македонската работна сила, економија и стабилна деловна средина.
Тој нагласи дека секоја нова инвестиција е дел од пошироката економска стратегија на Владата, насочена кон развој базиран на производство, извоз, инвестиции и реален економски раст.
Министерот за економија и труд Бесар Дурмиши оцени дека инвестицијата е силен сигнал дека Македонија станува сè попривлечна дестинација за компании кои носат нови технологии, современи производствени процеси и квалитетни работни места. Според него, одлуката на компанијата да го префрли дел од своето производство во земјава претставува значајна потврда за довербата во македонската економија и нејзиниот развоен потенцијал.
