Министерството за финансии изврши трансфер од 131 милион денари од централниот Буџет кон Развојната банка, средства наменети за реализација на проекти во домашните компании.
Како што информираат од Министерството за финансии, трансферот бил реализиран на крајот од минатиот месец, а со тоа вкупниот износ пласиран во домашната економија за инвестиции од страна на компаниите достигнува 14,1 милијарда денари, односно околу 230 милиони евра.
Оттаму посочуваат дека станува збор за 92 отсто реализација на кредитната линија обезбедена од Владата преку Унгарската експорт-импорт банка, со цел поддршка на домашното стопанство.
Средствата се пласираат до крајните корисници преку деловните банки, а кредитите се одобрени под поволни услови – каматна стапка од 1,95 отсто годишно, рок на отплата до 15 години и грејс-период до три години. Целта на оваа поддршка е поттикнување на приватните инвестиции, развој на компаниите и забрзување на економскиот раст.
Вкупниот буџет предвиден за поддршка на домашните компании изнесува 250 милиони евра, додека вкупниот инвестициски циклус се проценува на околу 300 милиони евра.
