Скопскиот градоначалник Орце Ѓорѓиевски информираше дека јавното претпријатие „Водовод и канализација“ активно работи на терен и дека во градот веќе се ставени во функција повеќе од 210 чешми за пиење вода.
Тој нагласи дека слична состојба има и со градските фонтани, од кои голем дел веќе повторно работат. Според него, во функција се и фонтаната „Александар Македонски“, која не работела осум години, како и „Лотосов цвет“ пред Градскиот парк.
Во однос на јавните тоалети, Ѓорѓиевски посочи дека постојните се под надлежност на фирмата „Тојфор“, но најави дека во подготовка се три современи јавни тоалети. Еден ќе биде поставен во Градскиот парк, еден на плоштадот „Филип Втори“, а еден во близина на Градскиот плоштад.
Градоначалникот најави и дека ќе започнат активности за повторно ставање во функција на подната фонтана на Градскиот плоштад, која во минатото неколку пати била оштетувана од возила.
На седницата на Советот, тој повторно се осврна на проектот БРТ, кој е во фаза на претквалификација и за кој наскоро се очекува распишување на тендер. Ѓорѓиевски истакна дека трасата нема да поминува низ централното зеленило, туку ќе биде придружена со нови зелени површини од двете страни на коридорот.
Тој најави дека проектот ќе биде јавно презентиран пред граѓаните, медиумите и советниците пред почетокот на неговата реализација, која се очекува до крајот на годината.
Покрај тоа, градоначалникот најави и реконструкција на киното „Милениум“, како и обнова на градската библиотека „Браќа Миладиновци“ и Планетариумот во МКЦ, како дел од подготовките за 2028 година кога Скопје ќе ја носи титулата Европска престолнина на културата.
Според него, со ребалансот на буџетот за 2026 година се предвидуваат средства за повеќе проекти од областа на урбанизмот, инфраструктурата, културата, образованието и заштитата на животната средина, како и за изградба на нова противпожарна станица, со цел побрза интервенција и зголемена безбедност во градот.
