По успешните гостувања во Црна Гора и Босна и Херцеговина, Македонскиот народен театар денеска ќе настапи во Дубровник со претставата „12“. Изведбата ќе се одржи во Казалиште „Марин Држиќ“, една од значајните театарски институции во Република Хрватска.
Од Македонскиот народен театар информираат дека Казалиште „Марин Држиќ“ континуирано соработува со бројни театарски куќи и ансамбли, носејќи пред својата публика разновидни продукции и современи драмски остварувања наменети за сите генерации.
Дубровник има богата театарска традиција и зазема важно место во хрватскиот и регионалниот културен простор. Градот е препознатлив по својата развиена драмска книжевност, сценска уметност и богата театарска дејност, што му обезбедува посебно место во културниот живот на регионот.
Претставата „12“ е поставена според мотиви од култното дело „12 гневни луѓе“ на Реџиналд Роуз, а адаптацијата и режијата се дело на Синиша Евтимов.
Во актерската екипа настапуваат Ѓорѓи Јолевски, Гораст Цветковски, Тони Михајловски, Никола Ристановски, Благој Веселинов, Александар Микиќ, Игор Џамбазов, Јордан Симонов, Нино Леви или Сенко Велинов, Дамјан Цветановски или Оливер Митковски, Владо Јовановски и Сашко Коцев.
„12“ е една од најгледаните и најактуелни претстави на репертоарот на Македонскиот народен театар. Преку силна актерска игра и современ сценски израз, таа отвора важни прашања за правдата, одговорноста, предрасудите и човековата совест.
Со ова гостување, Македонскиот народен театар продолжува активно да ја промовира македонската театарска уметност надвор од државата и да ја продлабочува културната соработка со значајни театарски институции од регионот.
