Министерот за економија и труд Бесар Дурмиши изјави дека цените на основните прехранбени производи во моментов се стабилни и дека нема потреба од дополнителни интервенции од страна на државата.
Според него, анализите покажуваат дека кај 55-те најбарани производи е забележан минимален пораст на цените од само 0,43 проценти, што, како што нагласи, претставува показател за стабилност на пазарот.
„Од 55 производи кои се најбарани, порастот е незначителен и изнесува само 0,43 отсто, што потврдува дека цените се стабилни. Доколку забележиме отстапувања во цените, ќе реагираме на начин како и во претходни наврати“, изјави Дурмиши.
Министерот посочи дека Владата внимателно ја следи состојбата и дека во случај на продлабочување на кризата или значително поскапување на производите ќе бидат преземени соодветни мерки за заштита на граѓаните.
Како една од можните мерки, Дурмиши го спомена и намалувањето на данокот на додадена вредност (ДДВ), доколку економските услови го наложат тоа.
Во однос на инфлацијата, тој оцени дека Македонија бележи пониски стапки во споредба со повеќе други држави, што, според него, е резултат на досега преземените економски политики и мерки.
Изјавата Дурмиши ја даде по прес-конференцијата посветена на Оперативниот план за вработување за 2026 година.
До крајот на неделава се очекува Државниот завод за статистика да ги објави најновите податоци за инфлацијата, кои ќе дадат појасна слика за движењето на цените во земјата.
