И покрај тоа што на македонскиот пазар на труд се евидентирани над 10.000 слободни работни места, најголемиот дел од побарувачката е концентриран во секторите со пониски и средни примања. Најновите податоци на Државниот завод за статистика покажуваат дека работодавачите најмногу бараат кадар во услужните дејности, продажбата и угостителството.
Во првото тримесечје од 2026 година биле регистрирани 10.247 слободни работни места, што претставува стапка од 2,07 проценти. Во исто време, во земјата се евидентирани над 484 илјади пополнети работни позиции, што укажува на релативно стабилен пазар на труд.
Најголем недостиг на работна сила има во секторот сместување и послужување храна, каде стапката на слободни работни места достигнува речиси пет проценти. Висока побарувачка се бележи и во административните и помошните услужни дејности. Според занимањата, најмногу се бараат работници во услужни дејности и продажба, со над 2.300 слободни позиции. Следуваат преработувачката индустрија и трговијата на големо и мало, со повеќе од 2.000 слободни работни места.
Од друга страна, најдобро платените сектори не бележат толку изразен недостиг на кадар. Иако во телекомуникациите и компјутерското програмирање има над 400 слободни позиции, најголемиот дел од високоплатените работни места се веќе пополнети.
ИТ индустријата останува лидер според висината на платите. Просечната нето-плата во овој сектор во март достигнала 115.557 денари, што е повеќе од двојно над државниот просек. Во истиот период, просечната нето-плата во земјата изнесувала 48.433 денари.
Високи примања се бележат и во телекомуникациите, транспортот, воздухопловниот сообраќај и фармацевтската индустрија, каде платите најчесто се движат меѓу 67.000 и 76.000 денари.
Според статистичките податоци, во земјата има 707.385 вработени и 90.499 невработени лица, додека неформалната вработеност бележи раст од 4,3 проценти во споредба со претходниот квартал. Најголем дел од неформално вработените се во земјоделството и градежништвото.
Експертите оценуваат дека бројот на слободни работни места укажува на континуирана потреба од работна сила, но и дека недостигот најмногу се чувствува во секторите каде платите се пониски, а условите за работа потешки.
