Агенцијата за храна и ветеринарство открила сериозни манипулации и измами на потрошувачите при спроведување на вонредни инспекциски контроли во поголемите синџири маркети во земјава. АХВ тестирала 91 мостра од млеко, млечни производи и сувомесни производи, од домашно производство и од увоз, со цел да се утврди дали нивниот реален квалитет соодветствува со она што е напишано на декларациите.
Засега се комплетирани лабораториските резултати за млечните производи, додека за сувомеснатите производи се чекаат финалните анализи за кои јавноста дополнително ќе биде информирана.
Па така од вкупно 45 анализирани мостри од млеко и млечни производи, кај дури 10 оператори со храна е констатирано дека производите не одговараат на Правилникот за квалитет на земјоделските производи. Кај нив е утврден значително помал процент на млечни масти од она што било официјално декларирано.
Најдрастичен е примерот кај еден оператор каде што при тестирање на мостра од одземени 22 килограми ситно сирење, лабораторијата открила неверојатна разлика – на пакувањето пишувало дека производот содржи 20 проценти млечна маст, а реално содржел само 1 процент. За оваа измама, на операторот му е изречена парична казна во износ од 3.500 евра во денарска противвредност.
Инспекторите на АХВ затекнале и оператор кој во производството на млечни производи користел растителни (палмини) масти.
„Кај овој оператор со храна, со тестирањата е констатирано користење на растителни масти во млечен производ, за што му е изречена парична казна од 1.300 евра во денарска противвредност. Спорниот млечен производ во вкупна тежина од 500 килограми е целосно повлечен од промет и нештетно уништен на депонија“, се наведува во соопштението на АХВ.
Поради измама на потрошувачите со прикажување лажни проценти на млечна маст, АХВ казни уште осум други оператори со храна. Овие производители и увозници ќе мора да платат парични казни во износ од по 1.050 евра во денарска противвредност за утврдените отстапки во нивните производи.
Од Агенцијата за храна и ветеринарство најавуваат дека нема да застанат тука и дека засилените инспекциски контроли кај оваа категорија оператори со храна ќе продолжат со исто темпо и во наредниот период, сè со цел заштита на здравјето и интересите на граѓаните.
