Цените на нафтата на светските пазари денеска бележат пад од речиси шест отсто, при што меѓународниот референтен Брент се движеше околу 98 долари по барел, додека американската сурова нафта ВТИ изнесуваше околу 91 долар по барел.
До падот дојде по зголемениот оптимизам дека САД и Иран би можеле наскоро да постигнат договор за намалување на тензиите и повторно отворање на Ормуската теснина, пренесува Трејдинг економикс.
Сепак, официјални претставници од двете страни предупредуваат дека клучните прашања сè уште не се целосно решени.
Американскиот претседател Доналд Трамп изјави дека евентуалниот договор со Иран „или ќе биде значаен или нема да се случи“, додека од иранското Министерство за надворешни работи соопштија дека има напредок во преговорите, но дека конечен договор сè уште не е на повидок.
Дополнителен фактор за намалување на цените е постепената нормализација на поморскиот сообраќај низ Ормуската теснина, еден од клучните светски енергетски правци. Според податоците за следење на бродови, дел од танкерите во последните денови без поголеми пречки го поминале протокот, што придонесе за намалување на стравувањата кај инвеститорите од прекини во снабдувањето со енергенси.
