Синдикалната минимална кошница за месец мај изнесува 68.743 денари, што претставува намалување од 54 денари во однос на април, кога изнесувала 68.797 денари, соопшти Сојузот на синдикатите на Македонија (ССМ).
Според пресметките на ССМ, доколку во трошоците се вклучи и изнајмен стан од 60 квадратни метри, вкупната вредност на синдикалната кошница се искачува на 84.117 денари.
Најголем дел од месечните трошоци и понатаму се однесуваат на храна и пијалаци, за кои во мај биле потребни 25.475 денари. Оваа категорија останува најголем поединечен трошок во структурата на минималната кошница.
За образование биле издвоени 7.192 денари, додека за облека и обувки 6.334 денари. Трошоците за домување, односно станарина, вода, електрична енергија и греење, изнесувале 6.338 денари.
Во делот на транспортот се издвоени 5.041 денар, а останатите средства се распределени за други основни потреби на едно четиричлено домаќинство, согласно методологијата на ССМ.
