Тројца пензионери од Делчево завршиле во полицискиот билтен откако биле затекнати како вежбаат гаѓање со воздушни пушки на кејот покрај реката Брегалница.
Од МВР информираат дека случајот бил пријавен на 8 мај околу 10:25 часот во ОВР Делчево. Според пријавата, Н.А. (76), Ф.С. (80) и Б.П. (80), сите од Делчево, пукале кон дрвена мета со две воздушни пушки со калибар 4,5 милиметри.
Воздушните пушки биле сопственост на Здружението на пензионери од Делчево, каде што пријавените биле членови.
Во разговор со полицијата, пензионерите објасниле дека се подготвувале за пензионерски спортски натпревар што треба да се одржи кон крајот на мај во Кочани.
Полицијата ги одзела метата, воздушните пушки и муницијата, а по целосно расчистување на случајот ќе бидат преземени соодветни мерки.
