Раде Трајковски Штекли како првообвинет за кривичното дело неовластено производство и пуштање во промет со наркотични дроги денеска е осуден на осум години затворска казна, додека Стефан Китанов, Александар Бучевски и Филип Таневски се осудени на по пет години затвор. Обвинетиот Стојан Миланов доби казна од три години и десет месеци.
Судот утврди дека обвинетите предводени од Штекли дејствувале како организирана група која продавала кокаин и марихуана, при што дрогата се чувала, пакувала и дистрибуирала преку мрежа на лица.
Судијата Илија Трпков посочи дека постапката што почна пред 9 месеци се водела ефикасно и без одолговлекување и покрај обидите за опструкција од страна на обвинетите.
Адвокатот на Штекли, Александар Новаковски по изрекувањето на пресудата, истакна дека одбраната има основа за жалба која ќе биде поднесена по добивањето на писмената одлука и нагласи дека обвинетиот имал здравствени проблеми поради кои тешко ја следел судската расправа, што влијаело на обезбедувањето докази во негова корист.
Одбраната, додаде, барала одлагање на постапката и замена на мерката ефективен притвор со куќен притвор, но судот ги одби овие барања и мерката е продолжена до правосилност на пресудата.
