Дежурен јавен обвинител од Основното јавно обвинителство Скопје изврши увид на лице место на локација во Кисела Вода, каде утрово при одрон на градилиште еден работник го загуби животот, а тројца беа повредени. Обвинителот издал наредба за обдукција на починатиот.
– Во насока на испитување на причините за несреќата и почитувањето на прописите за заштита при работа постапуваат и Државниот инспекторат за труд и општински градежен инспектор – информираат од Обвинителство.
Претходно, доктор Драган Панов, шеф на смена во Итна медицинска помош – Скопје, за МИА информираше дека според првичните информации, настраданите најверојатно се на возраст од 35 до 45 години, но, увидот ќе покаже за што точно станува збор и под какви околности се случила несреќата.
Загинатиот е на 34-годишна возраст.
Инаку, инвеститор на зградата во Кисела Вода каде се случи несреќата е поранешниот градоначалник на Аеродром Ивица Коневски. Тој изјави дека земjиштето на кое се гради зградата е на неговото семејство, а зградата ја гради фирмата „Јакимовски“. Според него сите процедури биле запазени, а до несреќата доќло најверојатно поради лизгање на земјиштето
Актиелната градоначалничката на Кисела Вода, Бети Стаменкоска-Трајкоска изрази длабоко жалење за трагичниот настан и додаде дека безбедноста на граѓаните и работниците е апсолутен приоритет и не смее да биде предмет на политички поени.
– Ја разбираме загриженоста на јавноста, но апелираме на одговорност и воздржаност од изнесување непроверени информации и политизација на случајот. Ваквите ситуации бараат сериозен и институционален пристап, а не дневнополитички реакции. Општината е отворена за дискусија во рамки на институциите, но одлуките мора да се темелат на факти и стручни анализи, а не на претпоставки – истакна градоначалничката Бети Стаменкоска Трајкоска.
Да потсетиме утрово МВР соопшти дека тројца работници биле затрупани, во несреќата која се случила по 8 часот, а повикот за помош е испратен во 8.17 минути, кога екипа на итната помош е испратена на местото, кои пак, според Центарот за управување со кризи информираше дека првиот повик за несреќата побарале дополнителна асистенција од Бригадата за противпожарна заштита за извлекување на затрупаните работници.
Во акцијата беа вклучени екипи на полицијата, Итната медицинска помош, пожарникарите и Центарот за управување со кризи.
