Новата сликовница „Месечко и Сончко“ од македонската авторка Лидија Тантуровска ќе биде промовирана на 16 април (четврток), со почеток во 18:30 часот, во Laboratorium.
Станува збор за топла и поучна приказна наменета за најмладите читатели, која на едноставен и близок начин ја обработува една од највечните теми — односот меѓу денот и ноќта. Преку вешта персонификација, Сонцето и Месечината се претставени како Сончко и Месечко, ликови што стануваат дел од детското секојдневие и нивниот природен ритам.
Во приказната, Месечко тивко и нежно ја презема својата улога со доаѓањето на ноќта, внесувајќи мир и сигурност, додека Сончко го означува почетокот на денот — ги буди децата и ја следи нивната игра, учење и радост. На овој начин, сликовницата создава симболична рамнотежа меѓу сонот и будноста, прикажувајќи ги како природни и неопходни делови од детскиот развој.
Дополнителна димензија на делото е внесената доза на љубопитност и фантазија, преку навестувањето за желбата на Месечко да го „ѕирне“ светот на децата и во текот на денот — мотив што отвора простор за имагинација и нови прашања кај младите читатели.
Текстот е на Лидија Тантуровска, илустрациите се на Иванка НиБа, а промотор на настанот ќе биде Ана Јовковска.
Промоцијата е отворена за јавноста.
