Светиот архијерејски синод на Македонската православна црква – Охридска архиепископија донесе одлука за избор на нов митрополит во прекуокеанските епархии. За Митрополит на Австралиско-новозеландската епархија е назначен Епископот Велички г. Никола (Трајковски), а одлуката стапува на сила веднаш.
Изборот следува по барањето на досегашниот администратор, Митрополитот г. Петар, да биде разрешен од оваа функција. По едногласната одлука, Архиепископот Охридски и Македонски г.г. Стефан се повлече од администрирањето со Австралиско-сиднејската епархија, додека управувањето со неа го презеде Синодот.
Новоизбраниот митрополит Никола е роден во 1974 година во Скопје. Дипломирал на Филолошкиот факултет „Блаже Конески“, а дел од образованието го продолжил на Карловиот универзитет во Прага, каде се насочил кон средновековна литература и византологија.
Неговиот духовен пат започнал во 1998 година со замонашување во манастирот „Свето Преображение“ во Зрзе. Потоа бил ракоположен во ѓаконски и свештенички чин, а во 2006 година станал игумен и старешина на манастирот „Свети Никола“ во Мариово, каде работел на негова обнова и ревитализација.
Во научната област, магистрирал на Богословскиот факултет во Софија, а моментално е докторант. Автор е на повеќе трудови од областа на црковната историја. Во 2012 година станал архимандрит, а во 2023 година бил избран за викарен епископ Велички на Преспанско-пелагониската епархија. Неговата хиротонија за епископ беше извршена во 2024 година во Битола.
Во пресрет на Велигденските пости, Синодот упати порака до верниците за духовна подготовка и молитвено поминување на постот, со достоен пречек на празникот Воскресение Христово.
Со оваа одлука се заокружува процесот на реорганизација на црковниот живот во Австралија и Нов Зеланд, со ново раководство на епархијата во овој регион.
