Во соработка со Францускиот институт во Скопје, годинава е отворен конкурс за најдобар фил(м)ософски есеј, кој го поврзува филмот со филозофската мисла. Темата е инспирирана од култниот филм „Омраза“ од 1995 година, во режија на Матe Касовиц, и носи наслов: „Анатомија на еден пад: ‘Засега е добро…’ или зошто одбиваме да го гледаме распадот околу нас?“.
Како дел од програмата, на 9 април во Културно-информативниот центар (КИЦ) во Скопје ќе се одржи проекција на филмот, наменета за ученици од средните училишта. Настанот започнува во 17:30 часот, по што ќе следува краток вовед во темата од м-р Виктор Јованоски, кој ќе биде достапен и онлајн за сите заинтересирани.
Учениците ќе можат да учествуваат со свои есеи под менторство на наставници, а рокот за испраќање на трудовите е до 4 мај. Есеите треба да се достават анонимно, а ќе ги оценува тричлена стручна комисија.
Завршниот настан и доделувањето на наградите ќе се одржат на 26 мај во Свечената сала на Филозофскиот факултет во Скопје. За најдобрите тројца учесници се предвидени стипендии, финансиски награди и вредни подароци, меѓу кои и литература и сертификати.
Победничкиот есеј ќе биде објавен во списанието „Филозофска трибина“, што претставува дополнителна можност за младите автори да се афирмираат во академската и културната јавност.
