Македонско-американскиот филм „Уште една игра“ (One More Game), во режија на Ник Јансен, од 11 март се прикажува во скопското кино „Синеплекс“, а од 12 март е во редовна кино-дистрибуција низ Македонија. Денес, 13 март, филмот има премиера и во Битола.
Станува збор за драма во времетраење од 1 час и 38 минути, наменета за публика над 12 години. Дистрибутер во Македонија е „Konstantin Film MKD DOOEL Skopje“. Филмот е снимен во 2023 година во Македонија со голема домашна екипа, со американски средства, во продукција на „Motion Creative“ од САД. Продуцент е Никола Китановски, сценариото и монтажата се на Јансен, а музиката ја потпишува Кирил Џајковски.
Во актерската екипа настапуваат Александра Пешевска, Далиа Стоименова, Гоце Андонов, Јасмина Василева, Марија Јанчевска, Петар Маниќ, Ведран Чешарек, Жаклина Стефковска, Зефанаја Тери, Марјан Наумов, Тони Михајловски и Дениз Ајдаревич.
Филмот ја следи приказната за Мартин, 16-годишник од Чучер-Сандево, кој сака да стане професионален гејмер. Неговата амбиција се судира со очекувањата на неговата мајка, а кога неговиот најблизок пријател добива шанса за проба во европски е-спорт тим, започнува борба што оди подлабоко од самата игра – борба за идентитет, амбиција и место во светот.
Дениз Ајдаревич: Влегување во психологијата на е-спорт ривалот
Меѓу ликовите што ја носат тензијата во филмот е Сликшот, лик кој го толкува Дениз Ајдаревич – карактер што претставува силна конкуренција во светот на е-спортот.
Ајдаревич не го крие задоволството од учеството во проектот, а за Прва Скопска ТВ изјави:
„Многу сум среќен што сум дел од филмот ‘One More Game’. Јас го играм ликот Сликшот, кој е еден вид негативец во приказната – лик што е исклучително добар во играта и знае како да ја користи својата вештина за да доминира над другите.
Интересно е што јас приватно не сум гејмер, па за да го разберам ликот морав буквално да влезам во тој свет. Поминав речиси три месеци затворен, играјќи игри и обидувајќи се да ја почувствувам таа психологија – адреналинот, ривалството и опсесијата што може да ја има еден гејмер. Тоа многу ми помогна да го изградaм карактерот.
Иако имам две сцени, тие се многу силни и ми дадоа простор да создадам впечатлив лик. За мене ова е навистина убаво актерско искуство и сум благодарен на продукцијата и на режисерот Ник што ми ја довери оваа улога.“
Подготовката што ја опишува актерот говори за сериозен пристап кон улогата и обид да се разбере еден специфичен современ феномен – психологијата на дигиталната конкуренција. Неговиот лик ја отсликува темната страна на амбицијата и натпреварувачкиот дух, кои во светот на е-спортот често се изразени подеднакво силно како и во традиционалните спортови.
Со оваа улога, Дениз Ајдаревич се позиционира како актер подготвен да вложи интензивна подготовка и лична трансформација за да создаде уверлив и впечатлив карактер, дури и во ограничен простор на екранот.
Филмот зборува за млади луѓе што сакаат да успеат во светот на е-спортот. Но зад игрите има многу повеќе – амбиција, его, пријателства и конфликти. „One More Game“ покажува како виртуелната игра понекогаш станува многу реална животна борба – изјави актерот Ајдаревич.
„Уште една игра“ продолжува со кино-проекции низ Македонија, носејќи приказна за младите генерации, дигиталната реалност и сонот да се успее во свет каде границата меѓу виртуелното и реалното станува сè потенка.
Миа Огненова Монај
