Започнува премиерната турнеја на македонскиот игран филм „Охридски лудории“, фолк-мјузикл снимен на повеќе локации во Охрид и околината, со учество на бројни музичари и актери од домашната сцена.
Првата премиерна проекција ќе се одржи вечерва (12 март) во 18:30 часот во Народниот театар во Битола. Веќе утре, на 13 март, филмот ќе биде прикажан во Центарот за култура „Марко Цепенков“ во Прилеп, исто така со почеток во 18:30 часот. Охридската публика ќе има можност да го проследи филмот на 18 март во Центарот за култура „Глигор Прличев“, со почеток во 18:30 часот.
„Охридски лудории“ е долгометражен проект инспириран од македонската фолк-сцена, во кој настапуваат познати естрадни имиња, меѓу кои Благојче Стојановски – Туше, Сања Барби, Дани Даниела, Ташко Каранфиловски и други, како и актерите Марјан Коцев и Жанко Голабоски.
Филмот е идеја на Александар Тасевски, продукцијата и режијата се на „Централ продукција“, а организацијата ја водат Благоја Стојановски – Пикси и Хари Сековски. Проектот беше најавен кон крајот на 2024 година како прв домашен фолк-мјузикл од ваков тип, со амбиција да ја промовира македонската музика и естрада.
По премиерите во овие три градови, најавени се и нови проекции во земјава, како и активности насочени кон публиката од дијаспората.
