Францускиот институт во Скопје и фестивалот Танц Фест вечерва ја носат претставата „F_AI_LLE“ на групата K.Danse, како пред-отворање на овогодинешното фестивалско издание.
Танцовата продукција ќе се изведе во 20 часот на сцената на Македонскиот народен театар.
„F_AI_LLE“ го истражува односот меѓу човечкото тело и вештачката интелигенција. Претставата го поставува прашањето како технологијата влијае врз движењето, присуството и сценската комуникација.
Со помош на сензори кои во реално време го регистрираат движењето на танчерите, се создаваат аудио-визуелни елементи што постојано се трансформираат. Сцената се претвора во динамична дигитална средина, каде телото и алгоритмот влегуваат во жив дијалог.
Перформансот ги спојува современиот танц и дигиталната уметност во единствено сценско искуство. Публиката ќе има можност да проследи уметнички експеримент што ги брише границите меѓу физичкото и виртуелното.
Организаторите ги повикуваат љубителите на современиот танц и новите технологии да присуствуваат на настанот.
Информации за билетите се достапни во Францускиот институт во Скопје и преку фестивалот Танц Фест.
