Драган Спасов-Дац и Александар Митевски најавија вистински музички маратон пред концертите „Дамите бираат“, кои ќе се одржат на 6 и 7 март во Македонскиот народен театар (МНТ), во пресрет на 8 Март. Дуото откри дека интересот бил огромен и можеле да закажат уште неколку термини, но одлучиле засега да останат на два концерта.
„Можевме да имаме и трет, и четврти, и петти концерт, но рековме да застанеме тука. Ќе има уште една прилика – на 18 јуни, кога ќе настапиме на отворањето на летната сцена ‘Славиша Кајевски’“, најавија тие.
Според Дац, вечерта ќе биде поделена во три сегменти и ќе понуди повеќечасовна програма. Настанот започнува со прием во фоајето на МНТ, каде публиката ќе ја пречека диџејот Миле Џолев. Потоа следува централниот концертен дел со бендот „Дрим тим“, а по официјалниот настап, дружбата продолжува со коктел и музика во фоајето, каде на клавијатури ќе настапи нивниот соработник Јоргуш.
„Од 20 часот па сè до околу еден по полноќ ќе има постојана програма. Ќе биде динамично, спонтано и живо – како што нè познава публиката“, рече Спасов, потенцирајќи дека траењето на концертот ќе зависи од атмосферата и интеракцијата со посетителите.
Митевски откри дека на сцената ќе има 16 до 17 музичари, а покрај авторските песни на дуото, ќе се изведуваат и познати хитови и евергрини. Публиката може да очекува и специјални гости, чии имиња засега остануваат изненадување.
„Концертите ќе бидат круна на она што го градиме изминатите години. Овој проект го носиме со љубов и сакаме вечерта да биде празник посветен на жената и љубовта“, рече Митевски.
Спасов додаде дека иако е пред пензија, проектот „Уште ми фалиш“ му дава нова енергија и мотивација.
Директорот на МНТ, Никола Кимовски, истакна дека за него е најважно театарот да биде дом на квалитетни културни настани, без разлика дали станува збор за театарска претстава или концерт.
„Како студент ги гледав претставите на Дац, а како тинејџер растев со музиката на Александар Митевски. За мене е чест што МНТ е домаќин на овие концерти“, изјави Кимовски.
Во меѓувреме, дуото ја промовира и својата прва винил-плоча „Уште ми фалиш“, која може да се нарача онлајн, потпишана од авторите.
Со богата сценска продукција, бројни музичари и неколкучасовна програма, „Дамите бираат“ ветува концертно искуство што ќе ја одбележи мартовската културна понуда во Скопје.
