Март во Националната опера и балет ќе помине во знакот на класичните ремек-дела. На програмата се две од најпознатите опери на Џакомо Пучини – „Тоска“ и „Мадам Батерфлај“, како и балетската класика „Оревокршачка“ од Петар Илич Чајковски.
Од Националната опера и балет информираат дека месецот е концепиран како омаж на оперската и балетската традиција, со изведби кои ја спојуваат драматичната експресија, музичката префинетост и сценската раскош.
Операта „Тоска“ ќе биде изведена на 6 март со почеток во 19:30 часот. Делото, познато по силната драматургија и интензивната музичка линија, ја обработува темата за љубовта, љубомората и злоупотребата на моќта, сместена во политички турбулентен контекст.
На 13 март во 19:30 часот на сцената ќе биде поставена „Мадам Батерфлај“ – емотивна приказна за љубовта, надежта и разочарувањето. Оваа опера важи за едно од најделикатните и најчувствителни дела на Пучини, со музика што носи силен емоционален набој.
Балетот „Оревокршачка“, ќе ја заокружи мартовската програма на 28 март. Делото на Чајковски, препознатливо по својот музички раскош и сценска магија, останува едно од најизведуваните балетски дела во светот и симбол на класичната балетска традиција.
Од институцијата потенцираат дека секоја изведба е внимателно подготвена со цел публиката да добие целосно уметничко искуство.
