Со 63 гласа „за“, седум „против“ и без „воздржани“, пратениците во Собранието на Република Северна Македонија го избраа Гоце Наумовски за нов уставен судија. По гласањето, тој даде свечена изјава дека функцијата ќе ја извршува совесно и одговорно, во согласност со Уставот и законите.
Изборот доаѓа откако професорката Јадранка Дабовиќ-Анастасовска во декември минатата година поднесе оставка од функцијата уставен судија поради здравствени и лични причини.
Наумовски е редовен професор по римско право на Правниот факултет „Јустинијан Први“ при Универзитетот „Свети Кирил и Методиј“ – Скопје. Воедно, тој е еден од надворешните соработници на премиерот Христијан Мицкоски од областа на правото. Гоце Наумовски е брат на поранешниот вицепремиер за евроинтеграции Васко Наумовски.
Неговата кандидатура беше предложена од претседателот на собраниската Комисија за прашања на изборите и именувањата, Ѓорѓија Сајкоски од ВМРО-ДПМНЕ, кој истакна дека Наумовски поседува импресивна биографија и кредибилитет за извршување на функцијата. Комисијата без расправа и со мнозинство гласови го утврди предлогот.
Од СДСМ оценија дека станува збор за кадровско решение на кабинетот на премиерот, обвинувајќи ја власта за обид да воспостави целосна контрола врз судството и обвинителството. Од ВМРО-ДПМНЕ возвратија дека Наумовски не е партиски член, туку угледен професор, за разлика од претходните предлози на СДСМ за членови на Уставниот суд, кои според нив биле партиски мотивирани.
