Реномираниот стоматолошки центар „Д-р Баткоски“ стана првиот имплант тренинг центар во Европа за доктори од Виетнам и Израел, лиценциран од израелска компанија „Ditron Dental“.
Како еден од светските лидери во имплантологијата, оваа биомедицинска компанија е фокусирана на истражување, развој и производство на врвни компоненти за дентална реставрација. Главен застапник на „Ditron Dental“ на македонскиот пазар е токму стоматолошкиот центар од Охрид.
Менаџерот и основач на центарот, спец. д-р Небојша Баткоски најавува дека во следните фази за развој на центарот ќе имаат можност да се вклучат доктори и од други земји. Дел од плановите е и отворање на нов центар.
„Нашата визија е да ги донесеме глобалните иновации дома и да им овозможиме на колегите пристап до најсовремените технологии и методи кои се применуваат во светот. Имплантологијата денес не е само враќање на функцијата на забите, туку уметност на создавање долготрајни и здрави насмевки. Соработката со ‘Ditron Dental’ ни овозможи да го организираме првиот лиценциран тренинг-центар за производите на овој израелски бренд во Европа. Стартуваме со првиот курс во февруари, дизајниран да им понуди решенија за комплексни случаи, нудејќи им знаења кои се веднаш применливи во нивната секојдневна практика“, вели спец. д-р Баткоски.
Првиот циклус предавања ќе се одржи од 17 до 21 февруари во Охрид, замислен како петдневен, интензивен меѓународен едукативен настан. Главен организатор е спец. д-р Небојша Баткоски, кој во обуката ќе се вклучи заедно со својот стручен тим: спец. д-р Билјана Пецакова, спец. д-р Марија Симончева, д-р Кирил Мандулоски, д-р Наташа Котевска и д-р Катерина Верушевска.
Тренинг-програмата е поделена во четири клучни модули: хируршки основи, хируршки процедури, протетски модул и хирургија во живо (Live Surgery). Програмата ги обединува најновите светски трендови, со посебен фокус на дигиталните технологии и прецизните хируршки протоколи. Наменета е за стоматолози кои сакаат да го усовршат своето знаење во имплантологијата, да го подобрат процесот на носење одлуки кај комплексни случаи и да стекнат поголема сигурност во хируршките и протетските работни процеси (workflow).
По успешното завршување на програмата, учесниците ќе добијат официјални сертификати за стекнатите знаења и вештини.
ВИДЕОТО МОЖЕ ДА ГО ПОГЛЕДНЕТЕ ТУКА
