Работник кој извршувал ископ со багер на локален пат помеѓу селата Митрови Крсти и Симница, во гостиварскиот регион, вчера наишол на сериозно и опасно откритие – две пластични буриња исполнети со муниција и експлозивни средства.
Како што соопштија од СВР Тетово, на 3 јануари 2026 година во 18:25 часот било пријавено дека при извршување градежни работи со работна машина – багер, вработени во фирма ангажирана за ископ пронашле две пластични буриња во кои имало куршуми, оквири за автоматско оружје, мини и други експлозивни средства.
Полицијата веднаш го обезбедила местото на настанот, а надлежните служби преземаат мерки за целосно расчистување и документирање на случајот. Засега нема информации како и кога опасните средства биле закопани на оваа локација, ниту дали се поврзани со конкретен кривично-правен настан.
Истрагата е во тек.
