Денеска продолжува судењето на трагедијата во кочанската дискотека „Пулс“. И на ова рочиште одбраната ќе дава воведни зборови. На ред се бранителите на четворицата обвинети поранешни директори на Дирекцијата за заштита и спасување и главниот инспектор во ДЗС, кои, заедно со останатите 30 обвинети физички лица се товарат за Тешки дела против општата сигурност.
Поранешните директори Шабан Салиу, Аднан Џафероски, Беким Максути и Џеват Селами и инспекторот Љупчо Грнчиштанов се обвинети дека од 2012 година не распоредиле инспектор за заштита и спасување во Кочани и никогаш не спровеле инспекциски надзор во дискотеката, за да проверат дали се исполнети задолжителните услови за противпожарна заштита.
По нив, воведен збор ќе даде одбраната на поранешните министри за економија Ваљон Сараќини и Крешник Бектеши. Тие се обвинети дека издале лиценците за работа на дискотеката „Пулс“, без да ја проверат документацијата. Од истото министерство обвинети се и петмина службеници – Џеваир Камбери, Шефкет Хазари, Зоран Николовски, Беким Хаџиу и Арлинда Касапи, при што Камбери е обвинет и за примање поткуп, во два наврати, за да се издаде лиценцата за „Пулс“.
На минатото рочиште одбраната на обвинетите градежни инспектори истакна дека причина за пожарот во дискотеката е употребата на пиротехниката, а не е пропуст во градежната конструкција на објектот, кој ниту се урна, ниту му се оштети статиката.
