Македонија подолго време добива пораки од ЕУ преку разни емисари дека сега е моментумот за започнување на преговори за влез во Унијата, ама, прво мора да го смениме Уставот. Но, никако да кажат дали ова е последниот услов, оти низ годините само се редеа услови и вета. Македонија до сега го смени Уставот неколку пати, смени знаме, па име на држава и пак Брисел не ги исполни ветувањата.
Затоа премиерот Христијан Мицкоски и синоќа повтори дека бара од ЕУ конкретни гаранции дека по евентуалната смена на уставот нема да има нови условувања од Бугарија.
-Ние како Влада бараме почитување на правата на македонската заедница кај нашиот источен сосед и гаранции да речеме во форма на заклучок од Европскиот совет, дека навистина нема никој против македонскиот идентитет, македонскиот јазик и дека нема да има повеќе вето поради билатерални прашања, потенцира Мицкоски.
Според него, доколку Македонија не го добие тоа, ќе значи дека некој има скриени намери и на некому не можеме да му се верува. И потенцира дека гаранцијата ја заслужуваме како народ после се она што тој направи за тие евроинтеграции.
