Пентагон објави дека прифатил анонимна донација од 130 милиони долари за исплата на американските трупи за време на финансиската блокада на Владата на САД.
Во соопштението на главниот портпарол на Пентагон, Шон Парнел, се вели дека Министерството за одбрана на САД во четвртокот „прифатило анонимна донација од 130 милиони долари во согласност со неговото општо овластување за прифаќање подароци“.
Донацијата е дадена под услов да се користи за компензација на трошоците за плати и бенефиции на припадниците на војската, според соопштението за медиумите објавено од Еј-Би-Си Њуз.
Околу два милиони припадници на американската војска се изложени на ризик да останат без плата доколку блокадата на финансирањето на владините институции продолжи.
Претседателот на САД, Доналд Трамп, претходно изјави дека богат приватен донатор обезбедил 130 милиони долари на американската влада за да ги покрие евентуалните недостатоци во исплатата на воените плати поради тековното затворање на владата.
Зборувајќи на настан во Белата куќа, Трамп го пофали донаторот како „патриот“ и „пријател“, но одби да го открие неговиот идентитет.
Претседателот на Претставничкиот дом, Мајк Џонсон, оцени дека станува збор за привремено решение и предупреди дека војниците наскоро би можеле да останат без плата доколку Конгресот не го усвои буџетот.
Федералната влада на САД е делумно суспендирана од 1 октомври поради несогласувања меѓу пратениците околу новиот буџет, а споровите околу субвенциите за здравствена заштита се во центарот на застојот.
МОЖЕБИ ЌЕ ВЕ ИНТЕРЕСИРА
