Необична сцена утрово привлече внимание во скопската населба Карпош, каде кобила се ождреби среде улица. Настанот предизвика бројни реакции на социјалните мрежи, откако граѓани споделија фотографии и информации од местото.
Фотографиите ги објави Игор Паневски, додека засега не е познато кому му припаѓа кобилата.
Активистката Билјана Николовска раскажа дека застанала за да му помогне на новороденото ждребе, кое лежело на коловозот. Таа успеала да го премести на тревната површина покрај патот, нагласувајќи дека останатите минувачи главно застанувале само за да снимаат со мобилните телефони.
Околу еден час подоцна повторно се вратила на местото за да провери како е животното, но ждребето сè уште лежело на земја и не успевало да стане.
Николовска потоа се обидела да побара помош од надлежните служби. Контактирала со Ветеринарната амбуланта во Автокоманда, од каде што ја упатиле во ЈП „Лајка“. Според нејзината објава, таму не добила одговор, а телефонскиот број што го имала за здружението „Анима Мунди“ не бил во функција.
На крајот стапила во контакт со вработен во Зоолошката градина, кој ја информирал дека ќе биде испратена екипа за да ја провери состојбата на ждребето.
Неколку часа подоцна активистката соопшти дека ждребето е живо и дека неговата состојба е добра, упатувајќи благодарност до сите што помогнале и реагирале.
