Во тек се градежните активности за целосна реконструкција на атмосферскиот канал „Црн Канал“ во Драчево, на потегот од улицата „Малешевска 1“ до локалитетот Мала Рада, во Катастарска општина Драчево 2.
Градоначалничката на Општина Кисела Вода, Бети Стаменкоска – Трајкоска, информираше дека работите на терен се одвиваат според предвидената динамика, а во првата фаза веќе се реализирани околу 50 проценти од планираните активности.
Во моментов се работи на санација на бетонското корито по должината на целиот канал, додека на делницата до мостот „Киро Фетак“ се поставуваат бетонски блокови кои ќе претставуваат стабилна основа за изградба на нова пешачка патека над каналот.
„Активно се работи на санирање на бетонското корито долж целиот канал, а на потегот до мостот „Киро Фетак“ се поставуваат бетонски блокови кои ќе бидат стабилна основа за нова пешачка патека врз самиот канал. Со оваа инвестиција, со поддршка од Владата, директно го подигнуваме нивото на безбедност и функционалност на инфраструктурата во Драчево и создаваме услови за посигурна и поквалитетна животна средина за сите жители“, изјави Стаменкоска – Трајкоска.
Од Општина Кисела Вода посочуваат дека проектот претставува значајна инфраструктурна инвестиција, која треба да придонесе за подобрување на системот за одведување на атмосферските води и намалување на ризикот од поплави.
Реконструкцијата се реализира во рамки на Унгарскиот кредит – Проекти фаза 2, како дел од владината програма, во соработка со Министерството за животна средина и просторно планирање.
