Додека СДСМ, како што велат од ВМРО-ДПМНЕ, „очекува неуспех и се радува на лоши вести“, Владата предводена од оваа партија продолжува со инвестиции, отворање нови работни места и мерки за развој на економијата.
Од ВМРО-ДПМНЕ посочуваат дека растот на инвестициите, извозот и градежниот сектор се главните двигатели на економските резултати.
Според партијата, економскиот раст од 4,3 проценти во вториот квартал од 2026 година е поддржан од значителен пораст на бруто-инвестициите, извозот на стоки и услуги, како и активностите во градежништвото и преработувачката индустрија.
„Бруто-инвестициите растат за 16,5 проценти, извозот на стоки и услуги за 10,4 проценти, градежништвото бележи раст од 21,9 проценти, додека преработувачката индустрија расте за 4,1 проценти“, наведуваат од владејачката партија.
Од ВМРО-ДПМНЕ додаваат дека економската политика на Владата ќе остане насочена кон привлекување нови инвестиции, поддршка на домашните компании, зголемување на извозот и создавање нови работни места.
„Работиме на одржлив економски раст кој создава нова вредност и подобар животен стандард за граѓаните“, велат од партијата.
Од владејачката партија најавуваат продолжување на капиталните проекти и активности за подобрување на конкурентноста на македонската економија.
