Безбедноста покрај кејот на Вардар е доведена во прашање поради глутници на кучиња скитници, алармираат граѓани на социјалните мрежи.
Ирина Нелковска упати јавен апел до надлежните и информираше дека ја нападнале утринава околу 07:00 часот движејки се кон работа со велосипед на патеката под болницата „Систина“. На клипот се гледаат четири-пет кучиња како ја бркаат.
„Останав смирена, очекував дека ќе се откажат и ќе ја поминам трасата. Не ме исплашија, тоа за мене беше очекувано. Ситуацијата стана опасна кога од пешачката патека почнаа да се приклучуваат нови и нови. Можеби беа околу 20 ако не и повеќе. Почнаа агресивно да се пуштаат, веќе не беше безбедно“, стои во нејзината објава на Фејсбук.