Враќање во минатото.
Што се случило на денешен ден?
Дневен времеплов на ПРВА СКОПСКА ТВ
6 ноември
На денешен ден во 1661 година е роден шпанскиот крал Карлос II, последен монарх од династијата на шпанските Хабсбурговци. Тој на престолот стапил како четиригодишник во 1665 година и владеел до 1700 година. Бидејќи немал наследник, по неговата смрт започнала војната за шпанското наследство, во која се судриле Франција, Австрија, Англија и Савоја.
На овој датум во 1813 година Мексико ја прогласило својата независност. Поттикнати од настаните во Северна Америка, свештениците Хидалго и Моралес повеле востание против шпанските колонизатори. Хидалго бил погубен, а Моралес ја продолжил борбата и токму на овој датум ја прогласил независноста на Мексико.
На денешен ден во 1814 година е роден белгискиот производител на дувачки инструменти Адолф Сакс, кој во 1840 година го измислил саксафонот.
На овој датум во 1825 година е роден францускиот архитект Жан Луј Шарл Гарние, автор на прочуената Париска опера, како и на Казиното во Монте Карло и Опсерваторијата во Ница.
На овој датум во 1860 година Абрахам Линколн бил избран за претседател на САД.
На денешен ден во 1861 година е роден канадскиот професор Џејмс Нејсмит – пронаоѓачот на кошарката.
На овој датум во 1880 година францускиот микробиолог Шарл Луј Лаверан ја открил причината за маларијата, откривајќи под микроскоп нова форма на микроорганизми кои ја предизвикуваат болеста.
На денешен ден во 1893 година во Санкт Петербург умрел Петар Илич Чајковски – најистакнат руски композитор и еден од најголемите симфоничари на XIX век, автор на „Лебедово езеро“, „Ромео и Јулија“ и „Евгениј Онегин“.
На овој датум во 1909 година во Куманово е роден Трајко Прокопиев – истакнат македонски композитор, диригент и прв директор на Средното музичко училиште во Скопје.
На овој датум во 1917 година, по пет месеци жестоки борби, завршила третата битка кај белгискиот град Ипр во Првата светска војна, со над 240.000 загинати.
На денешен ден во 1942 година во селото Битуше, Гостиварско, проработила првата партизанска печатница во Македонија – „Гоце Делчев“.
На овој датум во 1943 година советската армија во Втората светска војна ги протерала Германците од Киев, кој бил повеќе од две години под окупација.
На денешен ден во 1999 година Австралијците на референдум ја отфрлиле идејата за укинување на монархијата и воведување република.
На овој датум во 2007 година умрел Енцо Бјаџи, познат италијански новинар и долгогодишен уредник на емисијата „Ил Фато“ на РАИ, автор на повеќе од 80 книги.
