Тиквеш со играч помалку повеќе од еден час успеа да остане непоразен против актуелниот шампион Вардар, одигрувајќи 1-1 во последниот натпревар од петтото коло во Првата македонска фудбалска лига. Кавадарчани поведоа во 21. минута, кога по нафрлување од слободен удар Ибрахима Фал со глава ја затресе мрежата на гостите. Само четири минути подоцна судијата Грујоски, по прегледување на ВАР-снимката, му покажа директен црвен картон на Лавал по дуелот со Филип Најдовски, оставајќи го Тиквеш со десет фудбалери.
Вардар ја искористи бројната предност во 40. минута, кога по центаршутот на Давид Бабунски, Азер Омерагиќ со глава израмни на 1-1. И покрај играчот помалку, Тиквеш во второто полувреме беше поопасен, а најголемата шанса ја имаше Бесар Гуџуфи, кој во 57. минута ја погоди гредата.
Вардар дури во завршницата создаде неколку посериозни можности, но голманот Стевковски успешно интервенираше и го сочува бодот за домаќините. Тиквеш со голема борбеност, и покрај евидентната пристрасност на судиите кон Вардар, заслужено остана непоразен, додека Вардар не успеа да ја претвори повеќе од едночасовната бројна предност во победа.
