Вандали пак дивееле низ Скопје. Овој пат на удар се нашло детско игралиште во населбата Ченто, кое е демолирано и претворено во мини-депонија.
Жителка на населбата утрово објави видео и фотографии на социјалните мрежи од оштетеното игралиште и од неколку диви депонии во близина на последната постојка на улицата „Јужноморавски бригади”.
„Игралиштето го искршиле, вратите се откорнати, ѓубре се фрла насекаде.
Дајте расчистете, направете нешто. Има деца кои играат и се шетаат со своите родители. Имаше и чешма, но и таа е искршена”, напиша таа во својата објава.
Од видеото може да се види дека спортскиот терен е сериозно оштетен и полн со отпад, додека околните зелени површини се претворени во диви депонии. Во тревата се забележуваат и неколку паркирани автомобили, што дополнително ја влошува состојбата.