Скопје е полно со работи кои треба да се подобрат. Но, Скопје е преполно со општински соопштенија дека многу се работи.
Скопјани секојдневно се бомбардирани со соопштенија и фејсбук објави на скопските градоначалници дека некаде нешто се сработило. Ете сега е популарно дека се искосила тревата. Ќе се среди еден тревник, ќе се помине со косилка низ едно мало парче зелена површина – и веднаш следуваат десет соопштенија и фотографии од „големиот зафат”.
Но, град како Скопје не може да функционира со кампањско косење и со маркетинг наместо со систем. Зеленилото не се одржува само со косилка и со објава на социјалните мрежи, туку со план, календар и редовна грижа.
Тревниците не треба да се косат само кога тревата ќе стане до колена и кога граѓаните ќе почнат да реагираат. Тие треба да се одржуваат постојано, како дел од нормалното функционирање на општините.
На Скопје му треба системско решение за одржување на тревниците и зелените површини – јасен план, доволно екипи и континуирана работа. Но му треба и нешто уште поважно – повеќе зеленило. Нови паркови, нови дрвореди и проширување на зелените зони.
