Министерот за земјоделство, шумарство и водостопанство, Цветан Трипуновски, порача дека Владата останува на ставот за нулта толеранција кон корупцијата и дека секој што ги злоупотребува институциите ќе сноси одговорност.
При денешната посета на Росоман, тој истакна дека пристапот на институциите е неселективен и дека нема да има заштита за функционери кои постапуваат спротивно на законите.
Трипуновски нагласи дека, за разлика од претходниот период, кога според него биле заштитувани одредени функционери, сега институциите постапуваат поинаку и решително.
Тој ги повика граѓаните и земјоделците да пријавуваат евентуални злоупотреби, манипулации или незаконски дејствија, со цел навремена реакција од надлежните органи.
Министерот очекува случајот со директорот на Државниот инспекторат за земјоделство да биде целосно расчистен.
Претходно, Министерството за внатрешни работи соопшти дека директорот на Инспекторатот, 41-годишник од Кочани, бил лишен од слобода под сомнение дека примил поткуп од 50.000 евра, како дел од вкупно побарани 100.000 евра.
Против него е поднесена кривична пријава за „примање поткуп“, а Обвинителството за гонење на организиран криминал и корупција побара одредување мерка притвор.
