Министерот за внатрешни работи Панче Тошковски утрово добил СМС-порака за сообраќаен прекршок регистриран од системот „Safe City“, додека со приватно возило патувал кон Кавадарци, каде што денеска се одржува партискиот конгрес на ВМРО–ДПМНЕ.
Системот детектирал дека возилото се движело со брзина повисока од дозволената – за само еден километар на час.
„Ова е најдобар пример како треба да функционира државата. Системот важи еднакво за сите – ако регистрира прекршок, санкцијата следи, без разлика кој е зад воланот. Нема исклучоци, нема селективност, нема привилегирани,“ порача Тошковски.
Тој додаде дека управувањето со возило е обврска, а не привилегија, и нагласи дека целта на „Безбеден град“ е ред, дисциплина и зачувување човечки животи, а не казнување.
„Со бројот на жртви на патиштата што го имаме, мора да покажеме личен пример и одговорност. Државата ќе биде побезбедна само ако законите важат подеднакво за сите, вклучувајќи нè и нас кои сме најодговорни за нивното спроведување“, додаде министерот.
