Судиската комисија ја оцени како правилна одлуката за признавање на вториот гол на Силекс на натпреварот против Шкендија Арачиново, откако ситуацијата беше детално проверена со помош на ВАР.
Спорниот момент се случи во 54. минута од воведниот натпревар од 11. коло во Првата македонска фудбалска лига. По постигнатиот погодок, асистентот-судија, во согласност со ВАР протоколот, го одложи сигнализирањето за можен офсајд и дозволи акцијата да заврши, а потоа покажа дека постои сомнеж за недозволена позиција.
ВАР судиите веднаш ја започнаа проверката на ситуацијата. Поради тоа што стануваше збор за исклучително тесна офсајд-ситуација, беше извршена детална анализа со исцртување на офсајд-линии.
По завршувањето на проверката, ВАР утврди дека немало офсајд, по што главниот судија ја промени првичната одлука и го призна погодокот на домашниот тим.
Во анализата на судењето се наведува дека во преостанатиот дел од натпреварот судискиот тим успешно ја контролирал играта, правилно ги применувал Правилата на фудбалската игра, имал конзистентен критериум при санкционирањето на прекршоците и дисциплинските мерки, како и соодветно управувал со натпреварот и однесувањето на фудбалерите.
